Ég er að hugsa um að færa mínar hugleiðingar á sama stað og ég set myndirnar mínar. Þannig að prufið það ef þið hafið einhvern áhuga. www.123.is/ballroq

Ég verð þar þangað til annað verður ákveðið.

Halló

Páskahreti lokið

Byrjaður að vinna

Engar hænur og væntanlega fyrr en í haust

Of lítið um útreiðar

Temja folald

Hestaferð í lok júlí

Held einni hryssu

Styttist í fyrra folaldið

Nokkur ánægja með kosningar, ekki eins um hverjir ætla að stjórna. Kosningar fljótlega aftur.


Seinna

Það er spurning um að setja eitthvað á blað sem að engu máli mun skipta.

Það sem helst er að frétta er mjög fátt. Sýningum á Páskahreti er lokið og verða þær ekki fleiri og mun maður sennilega bara sakna þess að mörgu leyti þegar frá líður. Sýningar urðu alls 9 og voru ágætlega sóttar, ég hefði viljað hafa eina sýningarhelgi til viðbótar en það var ekki hægt vegna utanlandsferða og fleira hjá leikaraliðinu.

Ég hef síðan verið að sinna undanfarið forðagæslu og hef farið á nokkra bæi en þeir eru reyndar of fáir í mínu umdæmi. Ég vona að ég fái að sjá eitthvað forvitnilegt á þeim bæjum sem ég á eftir að fara á á næstu dögum.

Síðan styttist í að hænurnar komi hingað á Víðivellina en það á að setja allt á fullt í að standsetja aðstöðu fyrir þær núna í apríl. Þær verða þá vonandi komnar fyrir sumarið.

Ég verð náttúrulega að síðan að vinna á Hrauninu í sumar eins og undanfarin ár nema ég er harðákveðin í því að hætta þar um fjallferð og fara bara í sláturtíð í SS nema að ég fái pottþétt vilyrði fyrir því að fá að vera áfram, þá ætla ég að skoða málið. Ég byrja að vinna þar um miðjan maí og verð ég því að vera eirðarlaus fram að því. Mig langar að reyna að komast í sauðburð svona frá í kringum 20 apríl til 10 maí. Ég ætla að kanna þann möguleika annars verð ég bara latur fram í miðjan maí.

Síðan er stefnan sett á eina hestaferð í sumar og er undirbúningur að henni kominn í gang. Ég vona bara að ég komist með vegna vinnu og að ég fái einhverja hesta einhvers staðar. Ég ætla allavega með hann Draupni minn og svo ætla ég að láta Höð skokka með svona upp á grínið. Það er nefnilega málið að Pabbi er að fara líka í ferð í sumar, á Löngufjörur og þá þarf hann einhverja hesta og hann gengur fyrir þar sem það eru nokkur ár síðan hann fór síðast í ferð en ég fór í fyrrasumar, þannig að ég verð að bíða. Ég vona að úr þessu rætist á góðan hátt.

Svo þar sem það eru nú kosningar í nánd er rétt að minna fólk á að kjósa rétt og vanda valið á lýðræðislega kjörnum fulltrúum okkar. Og endilega setja x við nei að ESB aðild. Ég ætla allavega að setja eins og venjulega x við B í vor eins og áður og treysti því að það fólk sem ég kýs þar sé skynsamt og fari að óskum fólksins í landinu og sjái að Íslandi er best borgið utan ESB.

Það hefur margt gerst síðan ég skrifaði eitthvað hérna síðast. Ég er til dæmis búinn að taka margar ákvarðanir um að hætta í Framsóknarflokknum en alltaf hætt við það jafnharðann og haldið áfram að vera stoltur Framsóknarmaður.

Það sem helst er framundan núna er t.d. þorrablót í Þingborg. Ég hef verið að skipta mér af því hvernig annállinn er þetta árið án þess að taka þátt í honum beinlínis. Síðan er ég að setja upp ásamt öðrum Páskahret, leikrit eftir Árna Hjartarson, sem verður frumsýnt í lok febrúar. Þannig að þessa daganna er alveg nóg að gera hjá mér.

Ég er enn atvinnulaus og verð með þessu áframhaldi fram að sumri. Vonandi fæ ég allavega einhverja vinnu í sumar. Ég hef reyndar aðeins tekið að mér að sinna búfjáreftirliti hérna á Suðurlandi og fæ ég einhverjar tekjur úr því en það verður samt lítið úr því fyrr en kemur að vorheimsóknum á bæi í mars og apríl.

Fjárbúskapurinn gengur bara ágætlega hjá mér. Surtla og Jökla dafna ágætlega hjá Þorsteini, ég hef reyndar ekkert séð þær síðan einhvern tímann fyrir jól. En þá voru þær í góðu fóðri. Tamningar ganga líka ágætlega og ég fullyrði að ég hef sjaldan tamið jafnefnilegan hest og hann Höð minn. Hann verður feiknarlega mikill reiðhestur og virðist alveg hafa það sem til þarf til að líkjast honum föður sínum eitthvað en það er seinni tíma mál, allavega verður hann draumareiðhestur hjá mér.

Það er síðan ekki ólíklegt að ég og Bjössi verðum með folatitt á okkar snærum næsta sumar. Mjög vel ættaðan en ég vil segja frá því síðar ef af því verður en ef fólk sem kemur hér hefur áhuga að nota svoleiðis fyrir lítinn pening er það bara að fylgjast með hérna eða hafa samband við mig. Svo eins ef einhver á girðingu sem hann getur lánað mér fyrir nokkrar hryssur og stóðhest, þá má hann hafa samband líka.

En ég skal síðan reyna að vera duglegri að ausa úr skálum speki minnar hérna inni ef einhverjir eru ennþá að heimsækja þessa síðu og sérstaklega ef fólk kommentar

Sæl öll

Ég óska öllum þeim sem lesa þetta ennþá, gleðilegra jóla og farsældar á nýju ári. Vona að við hittumst öll í góðu skapi sem fyrst.

Jólakveðja
Baldur Gauti

Jæja þá er allt opinberlega farið til fjandans. Þeir tveir menn sem ég kaus til starfa fyrir mig á þing í síðustu kosningum og jafnframt þeir einu sem ég treysti til slíkra starfa á þessum síðustu og verstu tímum, hafa sagt af sér. Og það er klárt mál að ég mun á næstu dögum eða um leið og ég finn út úr því hvernig maður segir sig úr Framsóknarflokknum, drífa í því við fyrsta tækifæri.

Ég sé ekki ástæðu til að vera í flokki með fólki sem gat ekki fylgt sér að baki síns forystumanns heldur orsakaði ágreining sem varð til þess að formaðurinn sagði af sér. Ég er ekki fylgjandi því að Ísland eigi að stökkva á evru og Evrópusamband eins og flestir stjórnmálamenn eru fylgjandi og halda að þá lagist allt saman í einum grænum.

Að auki er ég og hef verið í einhvern tíma verið talsmaður þess að Íslendingar eigi að hætta að kjósa eingöngu uppskafninga eins og lögmenn á þing. Heldur eigum við að kjósa menn sem hafa gengið í gegnum lífsins ólgusjó og þekkja lífið, ekki fólk sem hefur verið í skóla alla sína tíð og þekkir ekki bæði kosti og ókosti lífsins af eigin raun.

Þessir suppskafningar eru ekki heiðarlegir enda eru lögfræðingar óheiðarlegustu menn sem til eru, þeir eru langtum óheiðarlegri en verstu glæpamenn landsins. Það felst í þeirra starfi að reyna hjálpa t.d. sekum glæpamönnum að losna við að bera ábyrgð á gjörðum sínum.

Það að menn eins og Bjarni skuli segja af sér þrátt fyrir lítið hliðarspor sýnir úr hverju hann er gerður. Einnig gengnir því sama um Guðna en það að segja af sér lífstarfinu til að lægja öldur innan flokksins síns sýnir að þar fer heill maður sem vill sínum vel.

Ballroqur kveður að sinni vondur út í íslenska þingmenn (nema Bjarna Harðar og Guðna, kannski pínu sár út í þá samt)

Jæja, þá er maður orðin fjárbóndi aftur.

En síðastliðin laugardag var langt í langferð að sækja nokkrar kindur. Við feðgar lögðum af stað um 9 leytið að laugardagsmorgni af stað frá Selfossi. Ferðinni var heitið austur í Öræfi. Með í för var öll Syðri-Vallarfjölskyldan eins og hún lagði á einum bíl og á öðrum voru Stefán og hans kærasta. Alls voru þetta sem sagt 3 bílar.

Austur í Öræfi vorum við komin rétt um klukkan 13:00. Þá var farið í það að finna rétt fjárhús. Þeir bæir sem fé var keypt á voru allir í Hofshverfinu. Þetta var hjá Gunnari Sigurjónssyni á Litla-Hofi, Erni Bergssyni á Hofi og Sigurjóni í Hofskoti. Það var byrjað hjá Gunnari og voru þar valdar nokkrar gimbrar til frekari skoðunar og 3 hvítir hrútar. 1 mórrauður hrútur var valinn strax.

Næst var haldið til Arnar. Þar var lítið eftir og var úr 7 gimbrum að velja og valdi Þorsteinn sér 5 af þeim. Ágætar allavega 2 sem ég skoðaði vel, hinar skoðaði ég ekki sérstaklega, en að ég tel þokkalegar kindur.

Þá var haldið á seinasta staðinn. Þar var töluvert úrval en sennilega síðsta féð á svæðinu. Þarna voru teknar 10 gimbrar.

Þar sem lítið var eftir af mislitu á hinum bæjunum ákvað ég að grípa eina svarta þarna. Stuttu seinna fannst reyndar mórauð kind sem var fjandi vel gerð en þar sem ég náði henni ekki þá bauð Steini honum Bjössa bróður mínum að eiga hana hjá sér uppí sumarkaupið síðan í sumar. Ég hefði viljað eiga hana frekar en ég hef reyndar alltaf verið hrifnari af svörtum lit en mórauðum, það er sennilega ástæðan fyrir því að ég fann hana ekki strax heldur rauk beint í það svarta sem var til þarna.

Hún fékk að sjálfsögðu bara nafnið Surtla og var það eiginlega Trausti sem nefndi hana. En hann var að þvælast þarna með Kristínu og tengdaforeldrum sínum einnig í fjárkaupaleiðangri.

Þessi svarta þarna er Surtla mín


Þetta er síðan sú mórauða sem Bjössi fékk að eiga.

Síðan var það fyndasta sem gerðist en pabbi var búinn að eiga botnótta kind í beinan ærlegg frá 1957 þegar við þurftum að drepa niður um árið. Hann sagðist síðan ekki ætla að eiga kind núna nema að hann finndi kannski eina botnótta þarna. Og viti menn hann fann hana, síðasta botnótta kindin á svæðinu. Þvílíkt lán sem kom yfir karlinn þarna.

Þetta er botna hans pabba.

Það að mæta svona seint á svæðið er verra en flestir sem voru að velja sér líflömb þarna, gerðu það fyrir hádegi. Það kostaði því að sennilega var það besta sem til var farið á aðra bæi og eins var lítið úrval af mislitu fé. En allt sleppur þetta fyrir horn hjá okkur og ég held að flestar gimbrarnar sem valdar voru séu ágætar. Nema þá kannski helst þessar mislitu sem við náðum en þær eru mjög misjafnar.

Það var ekki laust við að maður öfundaði Hrunamennina sem voru að velja sér á Hofskoti en í þeim hópi sem þeir höfðu tekið voru flekkóttar gimbrar, eitthvað sem manni hefði langað í. En kannski nær maður í svoleiðis næsta haust, sennilega munum við panta ákveðna lit fyrirfram á þeim bæjum sem verður farið á þá.

Þegar búið var að velja samtals 15 gimbrar á bæjunum Hofskoti og Hofi var haldið aftur í fjárhúsin á Litla-Hofi til að velja restina þar. Alls höfðum við tekið 13 gimbrar þar og voru þær teknar og engu bætt við. En þá átti eftir að velja hvíta hrútinn en 3 hrútar höfðu verið teknir frá til frekari skoðunar. Stefán var þá mættur og búinn að velja sínn hóp og ákvað hann að taka einn af þessum 3 hrútum en vildi leyfa Steina að velja fyrstum.

Hrútarnir voru skoðaðir í krók og kring. Og að lokum komst niðurstaða í málið og einum hrútnum var sleppt aftur í féð á bænum. Stefán ákvað að taka hrút sem gæfi mislitt, þrátt fyrir að vera hvítur. En Steini valdi sennilega besta hrútinn af þessum 3, hvað varðar sköpulag. Mig minnir að hann hafi fengið eitthvað um 83,5 stig við skoðun.


Þetta er hvíti hrúturinn sem varð fyrir valinu. Hann fékk nafnið Kári eftir Kára Sölmundarsyni í Njálssögu. Mórrauði hrúturinn fékk einnig nafn úr Njálu en það er Flosi eftir Flosa á Svínafelli. Báðir tengjast þeir einmitt Öræfunum í Njálu.


Einn mynd síðan sem tekin er yfir allan hópinn.

Að lokum þreifingum og þukli var féð rekið á bíl og keyrt heim í Flóann. Sá sem fékk þann heiður var Dóri sláturflutningabílstjóri hjá SS. Ferðin var samnýtt með Hrunamönnum. Alls voru þetta 40 lömb sem flutt voru samtals að Syðra-Velli og Gerðum þennan daginn, 10 að Gerðum og restin að Velli.

Ég á núna eftir að velja mér úr þeim hvítu gimbrum sem eru á Velli eina mér til eignar. Það geri ég sennilega um helgina. Þá mun ég taka myndir af henni og setja hérna inn.

(Bætt við þann 16 október)

Þá er ég búinn að fara að Velli og velja mér hvítu gimbrina sem ég átti eftir að velja. Það tók mig góðan tíma en hafist fyrir rest. En ég valdi gimbur númer 254 sem er frá Litla-Hofi að ég held. Þessa gimbur var ég búinn að horfa á síðan fyrir austan og þrátt fyrir að hafa skoðað allar gimbranar í hópnum, þá endaði ég á þessari. Það er að minnsta kosti ein gimbur í hópnum sem er með betri læri, en mér fannst þessi falleg. Hún er með ágæt læri, þétt átak á baki eða í alla staði myndarleg kind.


Ég fór síðan í það að velja á hana nafn. Ég hugsaði mikið og komst að einni niðurstöðu, Jökla skyldi hún heita. (Það er að segja hún er undan Vatnajökli og er hvít)


Síðan er hérna að lokum ein mynd af þá báðum kindunum mínum, þeim Surtlu og Jöklu. Ég þokkalega sáttur núna.

Ég vil benda áhugasömum á að inni á myndasíðunni minni www.123.is/ballroq eru fleiri myndir en eru hér með.

Jæja, ætli að sé ekki best að skrifa eitthvað, þrátt fyrir að ekkert merkilegt gerist hjá almennt séð.

En það er helst að frétta að ég fór ekki í staðarnám á Hvanneyri í vetur, heldur ætla ég að vera í fjarnámi í vetur í nokkrum áföngum. Því er ég að vinna áfram á Hrauninu en hversu lengi það verður er óvíst, því sennilega er minna starfskrafta ekki óskað þar lengur en fram í nóvember. Ef svo er ætla ég mér að hætta strax og reyna að komast í sláturtíð í SS í bili og sjá síðan til með framhaldið.

Þannig að ef einhver veit um vinnu handa mér í vetur, má hann endilega láta mig vita.

Í sumar gerði ég ýmislegt en ég fór t.d í eina útilegu sem er reyndar árleg, þ.e. Brúnastaðavíkingur, síðan var það Landsmót Hesstamanna á Hellu, eina hestaferð náði ég að tróða mér í á seinustu stundu en ég fór með frændum mínum nokkrum um Fjallabak. Síðan er það náttúrulega veiðiferðin sem minnst er á í seinustu færslu. Öðru man ég ekki eftir í augnablikinu.

Síðan fór ég að sjálfsögðu á fjall. En það var nú í 12 skiptið í röð sem ég fer. Ég fór á Tangann líkt og í fyrra haust. Skemmst er frá því að segja að fjallferð gekk mjög vel núna, óhappalaus og veður gott. Það þurfti varla að fara í galla þetta árið, annað en í fyrra. Réttir gengu ágætlega þrátt fyrir töluverða rigningu en það stytti upp þegar á leið og veður hefur sjaldan verið jafn gott í réttum og í ár. Reyndar fór að rigna mikið seinnipart dags en þá var réttum lokið og flestir að verða komnir langleiðina heim til sín.

Verstu fréttirnar sem ég fékk í sumar er þegar ég fékk að vita að merin sem ég fékk lánaða til að halda undir hest var geld, en ég hef aðgang að merinni aftur næsta sumar ef ég vil og því er ég byrjaður að hugsa hvaða hest ég eigi að nota.

En að öðru, um næstu helgi gerist atburður sem ég hef beðið eftir í ein 2 ár en þá eignast ég kindur aftur. En ég er sem sagt að fara austur í Öræfi að sækja okkur kindur ásamt frændum mínum á Syðra-Velli og Gerðum. Ég ætla að ná mér í 2 til að byrja með og vonandi get ég síðan sótt 1-2 næsta haust norður í land. Það er skiljanlega mjög mikil tilhlökkun með þetta hér á bæ og þó faðir minn segist ekki ætla að fá sér neina, er að mér finnst kominn mikill fiðringur í hann að kaupa sér líka. Ég mun reyna segja frá þessari ferð um næstu helgi

Meira verður það ekki að sinni en ég mun reyna að segja nokkupð ítarlega frá fjárkaupaferðinni í kringum næstu helgi.

Halló

Loks ætla ég að setja smá hér inn.

Ég fór í veiðiferð austur á land ásamt Ingva og Birgi í júní. Það var góð ferð komum heim með fullt af fiski, meðal annars rúmlega 7 punda urriða sem ég veiddi sjálfur. Það eru myndir af fiskinum á myndasíðunni minni.

Þá var landsmót núna í byrjun júlí. Ég mætti strax á mánudeginum, en þá var Bjössi að keppa og gekk það ágætlega hjá honum. Ég var síðan örlítið á þriðjudeginum og sjá forkeppni í B-Flokk gæðinga í hundfúlu veðri. Síðan mætti ég á fimmtudagsmorgninum og var fram á sunnudag, þó með smá skreppi á Selfoss í millitíðinni í bað og slíkt.

En ánægjulegasti dagurinn sem ég hef upplifað er þegar ég fékk þær fréttir að merin sem ég fékk lánaða í fyrra væri köstuð. Ég fór að sjálfsögðu og skoðaði samdægurs og komst þá að því að ég hafði fengið brúna hryssu. Ekki alveg liturinn sem mig langaði í en það var hryssa eins og ég vildi og því get ég ekki verið annað en ánægður. Hún hefur fengið nafnið Nanna, það er eftir Nönnu konu Baldurs hins hvíta í goðafræðinni. Ég held mig áfram við þessa nafnalínu en nú á ég orðið hesta sem heita Draupnir, Óðinn, Höður og svo Nanna. Allt kemur þetta úr goðafræðinni og tengist nafninu mínu á einhver hátt.

Það eru líka myndir af Nönnu á myndasíðunni.

Ég var að setja inn nokkrar myndir af folaldinu hans pabba sem fæddist á laugardaginn var, þann 26. apríl.

Myndirnar má sjá á myndasíðunni minni á http://www.123.is/ballroq/ undir Hraunprýði frá Litla-Hrauni.

Ég var búinn að skrifa langa færslu um ferðasögu mína austur á land og komandi tíma.

Ég nenni enganvegin að skrifa það aftur strax

er...........

Sæl öll

Í tilefni þess að ég skellti mér í leikhús í kvöld langar mig aðeins að segja frá því.

En, já ég skellti mér loksins á sýningu Leikfélags Selfoss, Með táning í tölvunni eftir Ray Cooney í þýðingu Jón Stefáns Kristjánssonar sem jafnframt leikstýrði verkinu. Ef þið lesendur góðir eruð að spá í að skella ykkur á þessa sýningu eftir að hafa lesið gangrýnina mína, er það því miður orðið og seint, því í kvöld var síðasta sýning á verkinu.

Leikfélag Selfoss sem er 50 ára á þessu ari 2008, frumsýndi þetta verk þann 11. janúar og hefur það gengið síðan. En í kvöld var semsagt lokasýning og var þéttsetið í litla-leikhúsinu við Sigtún.

Með táning í tölvunni er framhald af verki sem LS setti upp árið 1999 og hét Með vífið í lúkunum. Það verk gekk vel og er til að mynda aðsóknarmesta sýning sem LS hefur sett upp síðan það flutti í Sigtúnið.

Ég ætla ekki að fara mörgum orðum um sýninguna en dreg það helsta út úr. Þar ber helst, að öðrum ólöstuðum, leikur þeirra Eyjólfs Pálmarssonar sem John Smith og Davíðs Kristjánssonar sem Stanley Gardner. Þessir menn eru fæddir gamanleikarar og gefa verkinu kostulega blæ. Aðrir leikarar eiga allir góða spretti og er innslag pabbans sem Hermann Dan Másson leikur, mjög skemmtilegt. Leikfélag Selfoss á síðan 2 mjög efnilega leikara sem taka þátt í sýningunni en það eru þau Eyþór Helgason sem leikur Gavin Smith og Kolbrún Lilja Guðnadóttir sem leikur Vicki Smith. Og fyrst að ég er búinn að nefna þessa fimm leikara er rétt að nefna líka þá tvo síðustu en það eru þær Guðrún Halla Jónsdóttir sem leikur Mary Smith og Guðfinna Gunnarsdóttir sem leikur Barböru Smit, þær eiga líka góða spretti.

Þá má hrósa öðrum sem koma að sýningunni með sitt framlag en leikmyndinn er mjög flott. Einföld og er nýtt sem tvær íbúðir í sitthvoru hverfinu í London. Þá er lýsingin vel heppnuð en ekki er neitt mikið um mjög stórar ljósabreytingar en þar gekk allt fumlaust á þessari lokasýningu, eftir minni ljósabreytingunum tekur maður alls ekki.

Ég vil að lokum bara þakka Leikfélagi Selfoss fyrir mig og gefa þeim mikið hrós fyrir góða sýningu, ég sé ekki eftir því að hafa eytt mínu föstudagskvöldi í þetta. Þá vona ég einsog margir leiklistaráhugamenn á Suðurlandi að Sveitarfélagið Árborg sjái að sér og byggi upp glæsilega menningarsal sem LS getur fengið aðgang að til að gera stóra og enn betri hluti en gerðir eru þar í dag.

Allrasíðast langar mig að gefa sýningunni stjörnur líkt og alvöru gagnrýnandi.

Með táning í tölvunni er stórskemmtileg og fyndin sýning veitir manni góða kvöldstund í Litla-Leikhúsinu við Sigtún. 5 stjörnur af 5 mögulegum.

Sæl öll

 Ég er kominn á mótþróaskeið. Eða allavega finnst mér það. Og vil ég aðeins fá að tjá mig um það hér.

Þannig er eins og kannski flestir vita, að ég er mikið búinn að starfa að ýmsum félagsmálum í gegnum tíðina, meðal annars varf ég lengi búinn að vera í stjórn UMF Baldurs þegar ég dró mig út úr því starfi á síðasta aðalfundi. Ég var einnig formaður hestamannafélagsins Grana þegar ég var á Hvanneyri í búfræðináminu á sínum tíma.

Ég er líka búinn að vera félagsmaður í hestamannafélaginu Sleipni um langa hríð, einhver skipti hef ég þó gleymt að borga félagsgjaldið. Ég hef svo sem ekki verið mikið virkur innan þessa félags, þó var ég einhvern tímann í vallarnefnd félagsins.

Nú fyrr í kvöld var haldinn aðalfundur félagsins og á þeim aðalfundi voru kosnir einhverjir nýjir inn í stjórn félagsins. Ég komst reyndar ekki sjálfur á fundinn vegna þess að ég var í þorramatarboði. Og eftir þennan fund hef ég tekið ákvörðun um það að segja mig úr Sleipni í bili, að minnsta kosti á meðan þessi stjórn sem kosinn var er við stjórnvölin. Ég vil ekki nafngreina nokkurn mann en ákveðnir aðilar sem komnir eru til valda í Sleipni er fólk sem mér líkar alls ekki við, hef unnið með áður á öðrum vettvangi og fannst það virkilega erfitt samstarf. Einhverjir sem lesa þetta vita kannski hvað ég á við.

En að minnsta kosti ég verð utan hestamannafélaga í einhvern tíma nema maður ákveði að gagna til liðs við annað félag eða ef að þessi stjórn sýni einhvern vilja til að bæta félagið sem komið er næstum því alla leið í skítinn, þá endurskoða ég kannski þessa ákvörðun mína og geng að nýju í Sleipni.

Ég kannski blogga einhvern tímann fljótlega um það sem mér finnst að starfi Sleipnis á næstunni. En þangað til segi ég bless og góða nótt.

Já, það er ýmislegt búið að ganga á síðan ég skrifaði eitthvað hérna. Til dæmis er ég löngu búinn í öllum prófum og einnig í jólafríinu og er byrjaður á nýjan leik í skólanum.

Það er skemmst frá því að segja að ég er búinn að fá niðurstöðu í öll próf nema 1, náði ég þeim öllum. Eina prófið sem er eftir er próf í efnafræði. Þar á ég eftir að taka upptökupróf vegna falls í jólaprófinu. Veit ekkert hvenær ég tek það. Ég er nokkuð sáttur við þessar niðurstöður en það sem kemur mest á óvart er að mína hæsta einkunn úr þessum prófum er í stærðfræði af öllum greinum (tók prófið reyndar tvisvar). Ég HEF ALDREI VERIÐ GÓÐUR Í STÆRÐFRÆÐI, þannig hvaða rugl er þetta?

Jólafríið var líka gott. Ég dundaði mér í hesthúsinu og fór nokkru sinnum í gervi jólasveins (þarf ég nokkuð að fara í gervi?). Við Bjössi bróðir tömdum heilmikið saman og allt lítur það vel út. Það lítur allt ágætlega út með hann Höð minn. Það verður samt farið varlega með hann í vetur og séð til hvernig löppin á honum kemur undan vetrinum. Fluga, hans Pabba er enn efnileg og verður stefnt með hana í dóm í vor og er hún þjálfuð nú sérstaklega með það í huga, Bjössi sér um það.

Og að venju borðaði maður yfir sig af jólasteikum og áramótakalkún. Jóladagarnir voru góðir, gjafirnar sem ég fékk voru góðar, sérstaklega var ég ánægður með að fá Harðskafa, nýjustu bókina hans Arnaldar, einnig gáfu Pabbi og Mamma mér myndina um Ágúst afa á Brúnastöðum sem frumsýnd var á 100 ára afmælisdegi hans síðastliðið sumar, 1.ágúst. Hún heitir: Saga manns, Saga Þjóðar. Mæli með henni.

Ég vann líka smávegis í jólafríinu í Hvíta Húsinu, er sem sagt kominn á nýjan leik í dyravarðarstarfið. Ég vann 15 des á Á Móti Sól opnunarballi Hvíta Húsins, annan í jólum á SSSól og á gamlárskvöld. Hafði ég vel upp í krafsinu í öll skiptin. Vona að það haldi áfram.

Það sem fyrir liggur á næstunni er bara aðallega skólinn. Einnig styttist í þorrablót í Þingborg en það verður 26. janúar. Verður þetta í fyrsta skiptið í mjög mörg ár sem ég kem lítið sem ekkert að undirbúningi þess. Eg ætla að panta mér miða á blótið og njóta þess að horfa á skemmtiatriðin og hlægja. Kannski aðstoðar maður sitt fólk eitthvað í kringum helgina, föstudag eða jafnvel á laugardeginum ef þess þarf með.

Einnig á ég afmæli næstkomandi laugardag (allir að óska mér til hamingju með daginn) og er aldrei að vita nema að ég geri eitthvað í tilefni dagsins, sjáum til. Ég veit að það er fjallamannakvöld á Hestakránni og örugglega eitthvað meira að gerast.

Minni á myndasíðuna mína www.123.is/ballroq, endilega kvittið fyrir ykkur þar og hérna náttúrlega líka.

Takk fyrir í bili